பாடம்: 21. குர்ஆனை ஓதி முடிப்பது குறித்து வந்துள்ளவை

ஹகம் ரஹிமஹுல்லாஹ் கூறியதாவது : முஜாஹித் ரஹிமஹுல்லாஹ் என்னிடம் ஆள் அனுப்பினார்கள் . ( நான் அவர்களிடம் சென்றேன் ). “ நாங்கள் குர்ஆனை ( ஓதி ) முடிக்க நாடியுள்ளோம் ; எனவேதான் உங்களை நாங்கள் அழைத்தோம் . ( ஏனென்றால் ) குர்ஆனை முடிக்கின்றபோது ( கேட்கப்படுகின்ற ) பிரார்த்தனை ஏற்கப்படுகிறது என எங்களுக்குச் செய்தி கிடைத்தது ” என்றார்கள் . ( அதன்பிறகு ) அவர்கள் நீண்ட பிரார்த்தனைகளைச் செய்தார்கள் .

இப்ராஹீம் அந்நகஈ ரஹிமஹுல்லாஹ் கூறியதாவது : ஒரு மனிதர் பகலில் குர்ஆனை ஓதினால் வானவர்கள் அவர்மீது மாலை வரை அருள்வேண்டிப் பிரார்த்தனை செய்கிறார்கள் . அதை அவர் இரவில் ஓதினால் வானவர்கள் அவர்மீது காலை வரை அருள்வேண்டிப் பிரார்த்தனை செய்கிறார்கள் . மற்றோர் அறிவிப்பில் உள்ளதாவது : சுலைமான் அல்அஉமஷ் ரஹிமஹுல்லாஹ் கூறினார்கள் : நம்முடைய தோழர்கள் பகலின் தொடக்கத்திலும் ( காலை ) இரவின் தொடக்கத்திலும் ( மாலை ) குர்ஆனை முடிக்க விரும்புவதை நான் கண்டேன் . ( அதாவது குர்ஆனை முடிக்கின்ற துஆவைக் காலையில் அல்லது மாலையில் ஆக்கிக்கொள்ள விரும்புகிறார்கள் .)