பாடம்: 26. அல்மஹ்தி குறித்து வந்துள்ளவை

நபி ஸல்லல்லாஹு அலைஹி வஸல்லம் கூறியதாக அப்துல்லாஹ் பின் மஸ்ஊத் ரளியல்லாஹு அன்ஹு அறிவிப்பதாவது : ஒரு நாளைத் தவிர உலக நாள் மீதி இல்லையென்றாலும் , என்னிலிருந்து அல்லது என் குடும்பத்திலிருந்து ஒருவரை அனுப்புகின்ற வரை அல்லாஹ் அதை நீடிக்கச் செய்வான் . அவருடைய பெயர் என் பெயரை ஒத்திருக்கும் . அவருடைய தந்தையின் பெயர் என் தந்தையின் பெயரை ஒத்திருக்கும் . பூமி முழுக்க அநியாயம் நிரம்பியிருந்ததைப்போல் அது நீதியாலும் நேர்மையாலும் நிரம்பும் .

அல்லாஹ்வின் தூதர் ஸல்லல்லாஹு அலைஹி வஸல்லம் கூறியதைத் தாம் செவியுற்றதாக உம்மு ஸலமா ரளியல்லாஹு அன்ஹா அறிவித்ததாவது : மஹ்தீ என் குடும்பத்திலிருந்து ஃபாத்திமாவின் வாரிசுகளுள் உள்ளவர் ஆவார் .

அல்லாஹ்வின் தூதர் ஸல்லல்லாஹு அலைஹி வஸல்லம் கூறியதாக அபூஹுரைரா ரளியல்லாஹு அன்ஹு அறிவித்ததாவது : திமஷ்க்கின் முக்கியமான பகுதியில் சுஃப்யானீ எனும் மனிதன் புறப்பட்டுவருவான் . கல்ப் எனும் அரபுக் குலத்தினர் அவனைப் பின்பற்றி வருவார்கள் . பெண்களின் வயிறுகளைக் கிழித்துக் கொல்வான் ; சிறுவர்களைக் கொல்வான் . கைஸ் எனும் குலத்தினர் ( அவனுக்கெதிராக ) ஒன்று சேர்வார்கள் அவர்களையும் அவன் கொன்று சின்னாபின்னமாக ஆக்கிவிடுவான் . ஹர்ராவில் என் குடும்பத்திலிருந்து ஒரு மனிதர் புறப்பட்டுவருவார் . அவர் அந்த சுஃப்யானீயை அடைவார் . அவர் தம்முடைய படையினருள் ஒரு படையை அனுப்புவார் . அவர்களை அவன் தோற்கடித்துவிடுவான் . சுஃப்யானீ தன்னுடன் உள்ளவர்களோடு அவரை நோக்கி நடப்பான் . அவன் ஒரு பாலைவனப் பகுதிக்கு வருவான் . அதற்குள் அவர்கள் ( அனைவரும் ) பூமியில் செருகப்பட்டுவிடுவார்கள் . அவர்களைப் பற்றிய செய்தி அறிவிக்கின்ற ( ஒரு ) வனைத் தவிர அவர்களுள் யாரும் தப்பிக்க மாட்டார் .

அல்லாஹ்வின் தூதர் ஸல்லல்லாஹு அலைஹி வஸல்லம் கூறியதாக அபூஸஈதுல் குத்ரீ ரளியல்லாஹு அன்ஹு அறிவித்ததாவது : என் சமுதாயத்தின் கடைசிக் காலத்தில் மஹ்தீ புறப்பட்டு வருவார் . அல்லாஹ் அவருக்கு மழையைப் பொழியச் செய்வான் . பூமி தனது தாவரங்களை முளைக்கச் செய்யும் . அவர் பொருள்களைச் சரியான முறையில் வழங்குவார் . கால்நடைகள் பெருகும் . அச்சமுதாயம் பெருவளர்ச்சியடையும் . அவர் ஏழு அல்லது எட்டு ஆண்டுகள் வாழ்வார் .